ປທສ ລົງນາມບົດບັນທຶກຄວາມເຂົ້າໃຈ ວ່າດ້ວຍການຮ່ວມມືດ້ານ ຂໍ້ມູນຂ່າວສານ, ການສື່ສານ ແລະ ເຕັັກໂນໂລຊີ (ICT) ຮ່ວມກັບ ກະຊວງ ວິທະຍາສາດ ແລະ ໄອຊີທີ ສ.ເກົາຫລີ

   ເມື່ອບໍ່ດົນມານີ້, ທີ່ທຳນຽບປະທານປະເທດ, ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງ ປທສ ໄດ້ເຂົ້າຮ່ວມລົງນາມບົດບັນທຶກຄວາມເຂົ້າໃຈ  ວ່າດ້ວຍການຮ່ວມມືດ້ານ ຂໍ້ມູນຂ່າວສານ, ການ ສື່ສານ ແລະ ເຕັັກໂນໂລຊີ (ICT) ຮ່ວມກັບ ກະຊວງ ວິທະຍາສາດ ແລະ ໄອຊີທີ ສ.ເກົາຫລີ

ຕາງໜ້າເຂົ້າຮ່ວມລົງນາມ ໂດຍທ່ານ ຊິນ ຊອງ ຊຸນ ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສ. ເກົາຫລີ ປະຈຳ ສປປ ລາວ ເນື່ອງໃນໂອກາດມາ​ຢ້ຽມ​ຢາມລັດຖະກິດ ຢູ່ ສ​ປ​ປ ລາວ ຢ່າງ​ເປັນ​ທາງ​ການຂອງ​ປະ​ທານ​ປະ​ເທດ ສ.ເກົາຫລີ ໃນລະຫວ່າງວັນທີ 5-7 ກັນຍາ 2019, ທີ່ ນະຄອນຫຼວງວຽງຈັນ.

          ການລົງນາມບົດບັນທຶກຄວາມເຂົ້າໃຈໃນຄັ້ງນີ້, ຈະເປັນຂີດໝາຍອັນໜຶ່ງທີ່ສຳຄັນໃຫ້ແກ່ ສອງຝ່າຍ ກໍ່ຄື ສອງປະເທດ ທາງດ້ານວຽກງານ ໄອຊີທີ ແລະ ເປັນບາດກ້າວໜຶ່ງທີ່ເປັນພື້ນຖານໃຫ້ແກ່ການຮ່ວມມື ການ ຄຸ້ມຄອງວຽກງານໂທລະຄົມມະນາຄົມ ແລະ ໄອຊີທີ ໂດຍສະເພາະທາງດ້ານການສົ່ງເສີມການຮ່ວມມື ໃນການປັບປຸງບັນດາ ນິຕິກຳ, ກົດໝາຍ ແລະ ນະໂຍບາຍຕ່າງໆ ລວມໄປ ເຖິງການຝຶກອົບຮົມ ເພື່ອກຽມຄວາມພ້ອມສຳລັບເສດຖະກິດດິຈິຕອນ (Digital Economy)  ແລະ ອຸດສະຫະກຳ 4.0, ການຮ່ວມມືກັນໃນການພັດທະນາບຸກຄະລາກອນ ທາງດ້ານ ໄອຊີທີ, ການ ຄຸ້ມຄອງການໃຫ້ບໍລິການອິນເຕີເນັດ, IoT, AI, ການດັດສົມໂທລະຄົມມະນາຄົມ, ການຈັດສັນຄື້ນຄວາມຖີ່ ແລະ ການຄຸ້ມຄອງ ຄວາມປອດໄພທາງດ້ານຂໍ້ມູນຂ່າວສານ. ນອກນັ້ນ, ຍັງຈະມີການສົ່ງເສີມການຮ່ວມມື ທາງດ້ານເຕັກໂນໂລຊີການ ສື່ສານຂໍ້ມູນຂ່າວສານ ເພື່ອອຳນວຍຄວາມສະດວກໃນການແລກປ່ຽນ ທາງດ້ານເຕັກໂນໂລຊີ ແລະ ການຄ້າ ອີກດ້ວຍ.

          ຂ່າວໂດຍ: ກົມແຜນການ ແລະ ການຮ່ວມມື, ກະຊວງ ປທສ.

Login Form