ທ່ານ ທັນສະໄໝ ກົົມມະສິດ ເຂົ້າຮ່ວມກອງປະຊຸມ ການຮ່ວມມືສາກົນເສັ້ນທາງສາຍໄໝດິຈິຕອນ

                 
ທ່ານ ທັນສະໄໝ ກົມມະສິດ ລັດຖະມົນຕີ, ກະຊວງ ໄປສະນີ
, ໂທລະຄົມມະນາຄົມ ແລະ ການສື່ສານ (ປທສ) ພ້ອມດ້ວຍຄະນະ ​ໄດ້ເດີນທາງໄປເຂົ້າຮ່ວມກອງປະຊຸມ “ການຮ່ວມມືສາກົນ ເສັ້ນທາງສາຍໄໝ ດິຈິຕອນ” (Digital Silk Road International Cooperation Conference) ແລະ “ງານວາງສະແດງສິນ​ຄ້າ ທັນສະໄໝຈີນ” (Smart China Expo), ໃນລະຫວ່າງວັນທີ 25-28 ສິງຫານີ້, ທີ່ນະຄອນຊົງສິງ, ສປ. ຈີນ.

 

        ການເຂົ້າຮ່ວມກອງປະຊຸມໃນຄັ້ງນີ້ ແມ່ນເພື່ອເສີມຂະຫຍາຍການຮ່ວມມື ແລະ ການພົວພັນອັນດີ ລະຫວ່າງ ສອງຊາດ ລາວ-ຈີນ ໃນຂົງເຂດດິຈິຕອນ ແລະ ການຮ່ວມມືສາກົນເສັ້ນທາງສາຍ ໄໝດິ​ຈິ​ຕອນ. ​ໃນໂອກາດນີ້ ທ່ານ ທັນສະໄໝ ກົມມະສິດ ໄດ້ຮັບກຽດ ຂຶ້ນບັນຍາຍເພື່ອແລກປ່ຽນກ່ຽວກັບບົດຮຽນຂອງ ສປປ ລາວ ໃນການຮ່ວມມືສາກົນໃນຂົງເຂດ ເສດຖະກິດ ດິຈິຕອນ ທີ່ມີບົດບາດສຳຄັນ ໃນການສົ່ງເສີມຄວາມອາດສາມາດຂອງພາກທຸລະກິດ, ການຫັນເປັນອຸດສາຫະກຳ ແລະ ທັນສະໄໝ ແລະ ການນຳໃຊ້ເຕັກໂນໂລຊີການສື່ສານຂໍ້ມູນຂ່າວສານ (ICT) ເຂົ້າໃນວຽກບໍລິຫານລັດ.

            ພ້ອມກັນນີ້,​ ທ່ານ ລັດ​ຖະ​ມົນ​ຕີ ກະ​ຊວງ ປ​ທ​ສ ໄດ້ເຂົ້າພົບ ທ່ານ ຊີຊ່ຽນ ຮອງເຈົ້ານະຄອນ ຊົງສິງ ເພື່ອແລກປ່ຽນຄຳຄິດເຫັນກ່ຽວກັບການນຳໃຊ້ ເຕັກໂນໂລຊີ ດິຈິຕອນ ເຂົ້າໃນການພັດທະນາຕົວເມືອງທັນສະໄໝ.

         ວຽກງານການຮ່ວມມື ເສັ້ນທາງສາຍໄໝດິຈິຕອນ ເປັນວຽກງານທີ່ກະຊວງ ປທສ ຍາມໃດກໍໄດ້ເອົາໃຈໃສ່ ແລະ ໃຫ້ຄວາມສຳຄັນໃນການຮ່ວມມື ທັງໃນລະດັບສອງຝ່າຍ ແລະ ໃນລະດັບການຮ່ວມມືພາກພື້ນ ແລະ ສາກົນ. ກະຊວງ ປທສ ໄດ້ມີການລົງນາມບົດບັນທຶກວ່າດ້ວຍການຮ່ວມມືທາງດ້ານເສັ້ນທາງສາຍໄໝດິຈິຕອນ ຮ່ວມກັບຄະນະພັດທະນາ ແລະ ປະຕິຮູບ ສປ. ຈີນ (National Development and Reform Commission - NDRC) ໃນປີ 2017. ວຽກ ໄອຊີທີ ໂດຍລວມມີການຮ່ວມມືສອງຝ່າຍ ກັບ ກະຊວງ ອຸດສະຫາກຳ ແລະ ເຕັກໂນໂລຊີຂໍ້ມູນຂ່າວສານ (Ministry of Industry and Information Technology - MIIT). ບໍລິສັດ ໂທລະຄົມມະນາຄົມຂອງ ສປປ ລາວ ມີການເຊື່ອມໂຍງກັບ ບໍລິສັດໂທລະຄົມມະນາຄົມ ຂອງ ສປ ຈີນ ເຮັດໃຫ້ການສື່ສານ ລະຫວ່າງ ສອງປະເທດມີຄວາມສະດວກສະບາຍ.

           ໂດຍລວມ​, ສປປ ລາວ ກໍ່ກຳລັງກະກຽມຄວາມພ້ອມໃນການຫັນເປັນ ດິຈິຕອນ ທາງດ້ານໂຄງລ່າງພື້ນຖານ ແລະ ບຸກຄະລະກອນ ເພື່ອຮອງຮັບກັບການ  ປ່ຽນແປງ ດັ່ງກ່າວ.

Login Form