ກອງປະຊຸມໃຫຍ່ຄັ້ງທີ IV ຂອງຜູ້ແທນອົງຄະນະພັກ ເມືອງ ທົ່ງມີໄຊ.

ກອງປະຊຸມໃຫຍ່ຄັ້ງທີ IVຂອງອົງຄະນະພັກ ເມືອງ ທົ່ງມີໄຊ, ແຂວງ ໄຊຍະບູລີ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 10 ກຸມພາ2020, ທີ່ຫ້ອງປະຊຸມໃຫຍ່ຂອງເມືອງດັ່ງກ່າວ, ໂດຍການເປັນປະທານຂອງ ສະຫາຍ ສົມພອນ ໄຊດວງຕາ, ກໍາມະການພັກແຂວງ, ເລຂາພັກເມືອງ, ເຈົ້າເມືອງ ທົ່ງມີໄຊ, ເປັນກຽດເຂົ້າຮ່ວມມີ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ,ມີຄະນະປະຈຳພັກແຂວງ,

ປະທານສະພາປະຊາຊົນແຂວງ, ກໍາມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງອ້ອມຂ້າງ ເຂົ້າຮ່ວມ100 ກວ່າສະຫາຍ, ໃນນັ້ນມີຜູ້ແທນສົມບູນທີ່ມາຈາກຄະນະພັຮາກຖານ ແລະ ໜ່ວຍພັກທົ່ວເມືອງ 73 ສະຫາຍ, ຍິງ 9 ສະຫາຍ, ທີ່ເປັນຕົວແທນໃຫ້ແກ່ສະມາຊິກພັກທັງໝົດ 714 ສະຫາຍ.

ໃນວາລະດໍາເນີນກອງປະຊຸມ ສະຫາຍ ສົມພອນ ໄຊດວງຕາໄດ້ກ່າວໄຂກອງປະຊຸມຢ່າງເປັນທາງການ ພ້ອມທັງຜ່ານຮ່າງລາຍງານການເມືອງທັງສອງພາກຊຶ່ງໄດ້ທົບທວນ ແລະ ຕີລາຄາຄືນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ III ໂດຍຍົກໃຫ້ເຫັນຜົນສຳເລັດ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ຈາກການປະຕິບັດໜ້າວຽກງານຮອບດ້ານໄລຍະ 5 ປີຜ່ານມາ, ພ້ອມທັງໄດ້ກໍານົດທິດທາງ ແລະ ຄາດໝາຍສູ້ຊົນໃນຕໍ່ໜ້າ, 5 ປີຜ່ານມາທົ່ວເມືອງ ແມ່ນມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບໂດຍພື້ນຖານ, ເສດຖະກິດໄດ້ຮັບການຂະຫຍາຍຕົວຢ່າງຕໍ່ເນື່ອງ ໃນລະດັບ 8,84% ຕໍ່ປີ, ລວມຍອດຜະລິດຕະພັນພາຍໃນ ບັນລຸ 163,9 ຕື້ກີບ, ສະເລ່ຍລາຍຮັບຕໍ່ຫົວຄົນບັນລຸໄດ້ 17 ລ້ານກວ່າກີບ,ຫຼືເທົ່າກັບ 2.142 ໂດລາສະຫະລັດ, ສາມາດເກັບລາຍຮັບເຂົ້າງົບປະມານໄດ້ທັງໝົດ 7,62 ຕື້ກີບ, ທຽບໃສ່ກອງປະຊຸມຄັ້ງຜ່ານມາ ເພີ່ມຂຶ້ນ 26,57%, ພື້ນຖານໂຄງລ່າງໄດ້ຮັບການພັດທະນາເຊັ່ນ: ການກໍ່ສ້າງເສັ້ນທາງປູຢາງ, ປັບປຸງ ແລະ ສ້ອມແປງເສັ້ນທາງລະຫວ່າງບ້ານຕໍ່ບ້ານ, ປະຊາຊົນໄດ້ຊົມໃຊ້ໄຟຟ້າ 100%, ຊົມໃຊ້ນໍ້າປະປາ 53,8%, ການຜະລິດດ້ານກະສິກໍາ ໄດ້ມີຫຼາຍປັດໃຈໃໝ່ເກີດຂຶ້ນ ແລະ ຂະຫຍາຍຕົວໄປຕາມທິດທີ່ທັນສະໄໝເທື່ອລະກ້າວ, ວຽກງານວັດທະນະທໍາ-ສັງຄົມແມ່ນໄດ້ປັບປຸງຄຸນນະພາບການສືກສາຂັ້ນພື້ນຖານໃຫ້ສູງຂຶ້ນ, ເດັກໃນເກນອາຍຸໄດ້ຮັບການເຂົ້າຮຽນຢ່າງທົ່ວເຖິງ,ສຸມໃສ່ຕ້ານ ແລະ ສະກັດກັ້ນການແຜ່ລະບາດຂອງພະຍາດຕາມລະດູການ, ທົ່ວເມືອງຍັງມີບ້ານທຸກຍາກ 2 ບ້ານ, ກວມເອົາ 15,38%, ຄອບຄົວທຸກຍາກ 11 ຄອບຄົວ, ກວມເອົາ 0,54% ຂອງຄອບຄົວທັງໝົດ, ຈາກນັ້ນຜູ້ແທນກອງປະຊຸມຍັງຈະໄດ້ຄັດເລືອກເອົາຄະນະບໍລິຫານງານພັກເມືອງຊຸດໃໝ່,ຮັບຟັງການປະກອບຄໍາຄິດຄໍາເຫັນຂອງບັນດາຫ້ອງການ, ກົມກອງ ແລະ ຕົວແບບດ້ານຕ່າງໆ, ຮັບຟັງການໂອ້ລົມຂອງ ສະຫາຍ ເລຂາພັກແຂວງ ແລະ ຈະໄດ້ດຳເນີນໄປເປັນເວລາ 2ວັນຈິ່ງຈະສຳເລັດ.
...........
ຂ່າວ-ພາບໂດຍ: ອຸ່ນເຮືອນ ໂພທິລັກ.

 

ຜູ້ໃຫ້ບໍລິການທາງດ້ານໂທລະຄົມ

ຜູ້ເຂົ້າຊົມເວັບໄຊ

0040181
ມຶ້ນີ້
ມື້ວານນີ້
ອາທິດນີ້
ອາທິດກ່ອນ
ເດືອນນີ້
ເດືອນກ່ອນ
ຈໍານວນເຂົ້າຊົມທັງໝົດ
29
151
961
37994
386
4839
40181
Your IP: 18.232.51.69
Server Time: 2020-04-03 00:48:51